Anti Gliadin IgA immun sistemi tərəfindən qliadin molekuluna qarşı sintez olunan anticisimlərdir. Qliadin buğda, arpa, çovdar kimi dənli bitkilərin tərkibində mövcud olan qlüten zülalının əsas komponentidir. Bu anticisimlər əsasən seliak xəstəliyi (qlütenə-həssas enteropatiya) zamanı aşkarlanır.

Seliak xəstəliyi qlüten zülalına qarşı genetik dözülməzliyi olan şəxslərin nazik bağırsağında qlüten-tərkibli dənli bitkilərin qəbulundan sonra yaranan autoimmun iltihabi xəstəlikdir. Bu zaman bağırsaqların selikli qişası iltihablaşır, tədricən bağırsaq xovları atrofiyalaşır (villoz atrofiya), epitelial hüceyrələrin arasına limfositlərin infiltrasiyası baş verir. Pasientlərdə ilkin olaraq ishal (və ya qəbizlik), abdominal ağrı, meteorizm (köp), malabsorbsiya sindromu kimi bağırsaqların iltihabına bağlı əlamətlər üzə çıxır. Xəstəlik proqressivləşdikcə böyümə və inkişafın ləngiməsi, dəmir defisitli anemiya, osteoporoz, xroniki yorğunluq sindromu, aftoz stomatit (ağızın selikli qişasında kiçik ölçülü yaralar əmələ gəlir), herpetiform dermatit (dəridə davamlı qaşıntı hissi verən, boyunun arxası, qalça, dirsək, diz, kəllə, qasıq, üz nahiyyəsində adətən simmetrik yerləşən vezikulyar səpgilərlə xarakterizə olunur) kimi ciddi ağırlaşmalar baş verir. Bəzi pasientlərdə ataksiya, periferik nevropatiyalar üzə çıxır. Bu xəstəlik zamanı genetik həssaslıq DQ2 və DQ8 HLA (human leukocyte antigen) markerlərinə bağlı olur.

Seliak xəstəliyinə şübhə yarandıqda pasientin qan zərdabında Anti Gliadin IgA müayinə olunur. Lakin selektiv IgA defisiti olan pasientlərdə Anti Gliadin IgG-nin müayinəsi daha uyğun hesab olunur. Seliak xəstəliyini daha ətraflı tədqiq etmək üçün bu anticisimlərlə yanaşı Anti DGP IgA/IgG (deamidləşmiş qliadin zülalı), Toxuma transqlutaminzasına  və Endomisial antigenə qarşı sintez olunan IgA/IgG müayinə olunmalıdır.

Seliak xəstəliyinin yekun və dəqiq diaqnozu isə nazik bağırsağın biopsiyası əsasında qoyulur.

Son illər bu patologiyanın tədqiqində HLA tipləmə testindən istifadə olunur. HLA-DQ2 və HLA-DQ8  markerlərindən biri və ya hər ikisinin aşkarlanması pasientdə Seliak xəstəliyinə genetik meyl olduğunu göstərir.

Nümunə: qan zərdabı

Nümunə həcmi: 1,0 mL

Minimal həcm: 0,5 mL (bu həcmlə müayinəni təkrar aparmaq mümkün deyil)

Konteyner: qırmızı/sarı qapaqlı birdəfəlik istifadə üçün nəzərdə tutulmuş plastik sınaq şüşəsi (gelli sınaq şüşələrinə üstünlük verilir).

Analiz götürüldükdən sonra qan laxtalanan kimi zərdab hissə formalı elementlərdən ayrılmalıdır.