ASCA IgA Saccharomyces cerevisiae adlı maya göbələklərinin (bəzi qidaların tərkibində olur) polisaxarid (mannan) komponentinə qarşı sintez olunan anticisimlərdir. Bu anticisimlər əsasən bağırsaqların iltihabi xəstəlikləri zamanı aşkarlanır, lakin bu xəstəliklərin patogenezində adı çəkilən maya göbələklərinin nə kimi rol aldığı hələ tam aydınlaşdırılmayıb. Ehtimal olunur ki, bəzi şəxslərdə bu mikroorqanizmin hüceyrə divarındakı fosfopeptidomannana bənzər autoantigenlər mövcud olur. Bu autoantigenlər immun reaksiyanın yaranmasını və ASCA-nın (Anti- Saccharomyces Cerevisiae Antibodies ) sintezini inisiasiya edir. ASCA IgA ən çox Kron xəstəliyi zamanı (təxminən 60% hallarda) pozitiv olur və bağırsaq iltihabının bu forması üçün laborator marker olaraq müayinə olunur.

Kron xəstəliyi mədə-bağırsaq traktının iltihabi xəstəliyidir. Qeyri-spesifik xoralı kolitdən fərqli olaraq Kron xəstəliyi zamanı bağırsaqlarda iltihab asimmetrik və seqmentar olur. Yəni bağırsaq divarında normal və iltihablaşmış sahələr bir-birini əvəz edir. Abdominal ağrı, ishal (ağır vəziyyətlərdə qanlı ola bilər), qızdırma və bədən çəkisinin itirilməsi Kron xəstəliyinin əsas əlamətləridir. Xəstəlik proqressivləşdikcə anemiya, artrit, gözlərin iltihabı, ümumi halsızlıq, malabsorbsiya sindromu, böyümənin ləngiməsi kimi digər əlamətlər üzə çıxır. Bəzi pasientlərdə isə xroniki iltihabın ağırlaşması nəticəsində bağırsaq keçməzliyi yarana bilər.

Kron xəstəliyini qeyri-spesifik xoralı kolitdən, qıcıqlanmış bağırsaq sindromundan, mədə-bağırsaq traktının onkoloji xəstəliklərindən fərqləndirmək üçün qanda ASCA IgA anticisimləri ANCA (antineytrofil sitoplazma anticisimləri) ilə birgə müayinə olunmalıdır. Bir qayda olaraq ASCA IgA-pozitiv(+)/ANCA-neqativ(-) nəticə Kron xəstəliyi, ASCA IgA- neqativ(-)/ANCA-pozitiv(+) nəticə isə qeyri-spesifik xoralı kolit üçün xarakterik olur. Qıcıqlanmış bağırsaq sindromu, mədə-bağırsaq traktının iltihabi xəstəlikləri zamanı isə bu anticisimlərin heç biri aşkarlanmır. Lakin nəzərə almaq lazımdır ki, qeyri-spesifik xoralı kolit zamanı nadir hallarda ASCA IgA aşkarlana bilər.

Selektiv IgA defisiti olan pasientlərdə ASCA IgG-nin təyini daha məqsədəuyğun hesab olunur.

Nümunə: qan zərdabı

Nümunə həcmi: 1,0 mL

Minimal həcm: 0,5 mL (bu həcmlə müayinəni təkrar aparmaq mümkün deyil)

Konteyner: qırmızı/sarı qapaqlı birdəfəlik istifadə üçün nəzərdə tutulmuş plastik sınaq şüşəsi (gelli sınaq şüşələrinə üstünlük verilir).

Nümunə götürüldükdən sonra 2 saat ərzində zərdab hissə formalı elementlərdən ayrılmalıdır.